Zeltkolonie fir eis all 1

Wëlls du dëse Summer eppes erliewen an nei Kolleege kenneléieren? Da komm eraus aus denger Kummer, well d'Zeltkolonie 1 waart op dech! Hei schlofe mir all zesummen a groussen Zelter, a keen Dag ass wéi deen aneren. Mol starte mir gemittlech mat kreativen Atelieren, mol geet et voller Aktioun bei engem spannende Campspill lass. Op aneren Deeg maache mir Ausflich an eng Stad, an d'Schwämm oder an e grousse Park. D'Zeltkolonie 1 ass eng inklusiv Kolonie f...

Wëlls du dëse Summer eppes erliewen an nei Kolleege kenneléieren? Da komm eraus aus denger Kummer, well d'Zeltkolonie 1 waart op dech!

Hei schlofe mir all zesummen a groussen Zelter, a keen Dag ass wéi deen aneren. Mol starte mir gemittlech mat kreativen Atelieren, mol geet et voller Aktioun bei engem spannende Campspill lass. Op aneren Deeg maache mir Ausflich an eng Stad, an d'Schwämm oder an e grousse Park.

D'Zeltkolonie 1 ass eng inklusiv Kolonie fir jiddereen, onofhängeg dovun, ob een mat oder ouni Beanträchtegung lieft. Bei eis stinn Frëndschaft, Zesummenhalt a Spaass am Mëttelpunkt.

Wärend dësem Camp schlofe mir a groussen Zelter op Feldbetter. Mir maachen och eng Wanderung, bei där mir op mannst eng Nuecht op engem Bauerenhaff, an enger Scheier oder an engem Ënnerstand verbréngen.

Vergiesst net, dat néidegt Material fir Äert Kand matzebréngen, wéi zum Beispill e Schlofsak an e Këssen, e Rucksak a fest Schong.

An dësem Camp sti bis zu 12 Plaze fir Kanner mat spezifesche Besoinen zur Verfügung. Wann Äert Kand esou Besoinen huet, deelt eis dat w.e.g. bei der Umeldung mat. Eng obligatoresch Reunioun virum Camp tëschent den Elteren an de Campresponsabelen ass néideg, fir d'Besoinen an déi individuell Situatioun vum Kand besser kennenzeléieren.

Déi definitiv Decisioun iwwer eng Participatioun gëtt vum SNJ a Consultatioun mat de Campresponsabele getraff. Dobäi gëtt gekläert, ob d'Sécherheet an d'Wuelbefanne vum Kand wärend dem Camp garantéiert ka ginn.

Mir freeën eis schonn riseg, en Deel vum August zesumme mat dir a villen anere Kanner ze verbréngen!