Zirkuskolonie

Et ass nees esou wäit! De Marc Strasser, besser bekannt als Jonn Happi, schléit zesumme mat den Animateuren säin Zirkuszelt am Mariendall op. Hues du Loscht, nei Fäegkeeten wéi Trapez, Jongléieren, Diabolo oder Tissu ze léieren? Egal ob s du schon Erfarung hues oder net, hei bass du genee richteg! Bréng einfach gutt Laun a Freed mat, fir zesumme mat dengen Frënn eng onvergiesslech Woch am Zirkuszelt ze verbréngen. Nieft de spannenden ...

Et ass nees esou wäit! De Marc Strasser, besser bekannt als Jonn Happi, schléit zesumme mat den Animateuren säin Zirkuszelt am Mariendall op.

Hues du Loscht, nei Fäegkeeten wéi Trapez, Jongléieren, Diabolo oder Tissu ze léieren? Egal ob s du schon Erfarung hues oder net, hei bass du genee richteg! Bréng einfach gutt Laun a Freed mat, fir zesumme mat dengen Frënn eng onvergiesslech Woch am Zirkuszelt ze verbréngen.

Nieft de spannenden Zirkusaktivitéiten erwaart dech och e flotte Programm mat Waasseraktivitéiten, wéi Stand-up Paddle, Kajak oder Kanu. Fir Ofkillung a vill Spaass ass also gesuergt!

Um leschten Dag ass et dann esou wäit: Du kanns deng nei Fäegkeeten, déi s du am Laf vun der Woch geléiert hues, an enger fantastescher Show denger Famill an dengen Frënn presentéieren.

An dësem Camp sti Plaze fir Kanner mat spezifesche Besoinen zur Verfügung. Wann Äert Kand esou Besoinen huet, deelt eis dat w.e.g. bei der Umeldung mat. Eng obligatoresch Reunioun virum Camp tëschent den Elteren an de Campresponsabelen ass néideg, fir d'Besoinen an déi individuell Situatioun vum Kand besser kennenzeléieren.

Déi definitiv Decisioun iwwer eng Participatioun gëtt vum SNJ a Consultatioun mat de Campresponsabele getraff. Dobäi gëtt gekläert, ob d'Sécherheet an d'Wuelbefanne vum Kand wärend dem Camp garantéiert ka ginn.

Mir freeën eis op eng Woch voller Spaass, Bewegung a flotte Momenter mat dir!